Министрите за надворешни работи на Европската унија денеска усвоија нов пакет санкции насочен против одговорните за депортацијата и присилното посвојување на украински деца. Со мерките се опфатени 16 поединци и седум организации.
Овој потег, како што се наведува во официјалното соопштение, „ги таргетира оние одговорни за систематската незаконска депортација, присилното преместување, присилната асимилација, вклучително и индоктринација и милитаризирано образование на украински малолетници, како и нивното незаконско посвојување и отстранување во Руската Федерација и во рамките на привремено окупираните територии“.
Санкциите предвидуваат замрзнување на средства во рамките на Унијата и забрана за влез на санкционираните лица. Меѓу организациите се најдоа групи блиски до руското Министерство за образование, одговорни за „проруска индоктринација, вклучително и патриотски настани, идеолошко образование и воено-ориентирани активности“.
Според податоците на Европската комисија, од почетокот на инвазијата во 2022 година, околу 20.000 деца се однесени во Русија или на окупираните територии. Досега, и покрај сите напори, вратени се само околу 2.100 деца.
Во соопштението се додава дека санкционираните се одговорни за „промовирање на патриотско и воено образование кај младите луѓе преку идеолошка индоктринација, изложеност на руската воена култура, паравоена обука и учество во настани што ја слават агресивната војна на Русија“.