Основното јавно обвинителство поднесе обвинителен предлог против припадник на обезбедувањето на премиерот Христијан Мицкоски, поради сторено кривично дело „телесна повреда“. Настанот се случи во семејниот дом на обвинетиот, каде по вербална расправија, тој физички ја нападнал својата сопруга.
Според наводите во предлогот, нападот се случил пред нивната малолетна ќерка. Обвинетиот ја удирал жената по лицето и главата, а потоа ја фатил за вратот и почнал да ја дави. На оштетената ѝ биле нанесени телесни повреди и сериозна психичка вознемиреност.
Жената успеала да се засолни во тоалет, но кога се обидела да го напушти домот со детето, сопругот ѝ го одзел и го оштетил нејзиниот мобилен телефон. Помош побарале кај сосетка која ги примила во својот дом.
Обвинителството достави и предлог за продолжување на мерката притвор. Како причини се наведуваат опасноста од бегство, но и ризикот од повторување на делото, со оглед на тоа што обвинетиот живее во заеднички дом со оштетената и детето.