Германскиот министер за финансии, Ларс Клингбајл, денеска упати остри критики до Вашингтон, обвинувајќи ја администрацијата на Доналд Трамп дека со „неодговорната војна во Иран“ директно ја загрозува германската економија. Повод за ваквата реакција е драматичното намалување на проекциите за даночните приходи на Германија, кои за периодот од 2026 до 2030 година се скратени за дури 70 милијарди евра.
Според Клингбајл, војната што САД и Израел ја започнаа на 28 февруари предизвикала глобален енергетски шок кој најсилно се чувствува во европското индустриско јадро. Високите трошоци за енергија и падот на побарувачката за извоз се главните фактори за економската стагнација со која Германија се бори подолго време.
Односите меѓу сојузниците се на најниско ниво откако канцеларот Фридрих Мерц ја презеде функцијата. Тензиите ескалираа по изјавата на Мерц дека иранските преговарачи ја „понижиле“ Белата куќа, на што Трамп одговори со жестоки критики на социјалната мрежа Truth Social.
„Не е ни чудо што на Германија ѝ оди толку лошо, и економски и на секој друг начин!“, порача Трамп, сугерирајќи му на Мерц да се фокусира на „уништената земја“ и имиграцијата.
Како директна последица на овој дипломатски судир, Пентагон веќе најави план за повлекување на 5.000 американски војници од базите во Германија, одлука која германското Министерство за одбрана ја оцени како „предвидлива“. Ситуацијата дополнително се влошува поради блокадата на Хормушкиот теснец, низ кој минува 20% од светската нафта, што ги држи цените на горивата на рекордно ниво и покрај моменталниот прекин на огнот.