Вознемирувачка видео снимка на која јасно се гледа брутално врсничко насилство врз малолетно девојче во Штип ја шокираше македонската јавност, откако на својот Фејсбук профил ја сподели адвокатката Маја Ристова. На видеото, кое сведочи за настани од пред неколку месеци, се гледа како жртвата е удирана со тупаници и шлаканици по главата и телото, а потоа е и клоцана додека лежи беспомошно на земјата. Насилството, според наводите, се случувало на повеќе локации низ градот.
И покрај сериозноста на физичкиот напад, институционалниот одговор предизвика остри критики. За кривичното дело „Насилство врз дете“, јавниот обвинител предложил воспитна мерка – „Засилен надзор од страна на Центарот за социјални работи“. Сепак, судот проценил дека дури и оваа мерка е престрога, па на насилниците им изрекол само „Засилен надзор од страна на родител“.
Адвокатката Ристова изрази огромно разочарување од ваквиот пристап на правосудниот систем, нарекувајќи ја мерката „пресмешна“. Предметот во моментов се наоѓа во жалбена постапка. Во меѓувреме, кривичните пријави за „Запуштање и малтретирање на дете“ првично биле отфрлени, но по поднесена жалба, предметот е вратен на повторно одлучување.
„Поентата ми е како институциите гледаат на овој проблем. Слично како со семејното насилство. Изгледа треба да се случи ‘Рибникар’, за да се разбудат, како што се разбудија за семејно насилство по случајот ‘Ивана и Катја’“, предупредува Ристова.
Министерството за внатрешни работи (МВР) реагирало по службена должност и до Обвинителството поднело кривични пријави против малолетниците. Во тек е судска постапка за делата „насилство врз дете“ и „неовластено снимање“, насочена кон децата кои учествувале во нападот и ги снимале насилничките сцени. Засега, институциите не побарале никаква кривична или прекршочна одговорност од родителите на насилниците.