Македонската спортска јавност се простува од Сами Адеми, долгогодишен новинар, коментатор и еден од доајените на спортското новинарство во земјава.
Веста за неговата смрт ја сподели Фудбалската федерација на Македонија преку емотивна објава на социјалните мрежи, потсетувајќи на неговата долгогодишна посветеност кон спортот и македонската репрезентација.
„Замина тивко, како што знаат да заминат големите“, напишаа од ФФМ.
Сами Адеми со децении беше дел од македонската спортска сцена, препознатлив по својот глас, коментаторски стил и присуството на најзначајните спортски настани. Како новинар и коментатор на МТВ 2, тој беше сведок на бројни успеси, натпревари и спортски моменти што останаа запаметени кај генерации гледачи.
„Гласот што со децении ги раскажуваше нашите натпревари, човекот што ја живееше репрезентацијата и беше таму кога се славеше и кога беше најтешко“, стои во објавата на Фудбалската федерација.
Од ФФМ додаваат дека Адеми не бил само хроничар на спортските случувања, туку и човек кој бил дел од самата спортска приказна.
„Од МТВ 2, од стадионите, од секоја спортска приказна, Сами не беше само сведок, туку дел од играта“, наведуваат од Федерацијата.
Неговото име ќе остане запаметено како дел од историјата на македонското спортско новинарство, а колегите, спортистите и љубителите на спортот ќе го паметат по професионалноста, смиреноста и љубовта кон спортот.
„Ќе недостига. Почивај во мир, Сами“, порачуваат од ФФМ.