На полигонот Кура, во рускиот далекоисточен регион Камчатка, денеска започнаа ракетни тестирања на нуклеарните капацитети на земјата. Како што пренесува „Анадолија“, овие стратешки вежби е предвидено да траат до 10 мај.
Регионалните власти веќе воведоа строги ограничувања за движење во целата област додека траат активностите.
„Присуството и движењето луѓе и каква било опрема се забранети“, се наведува во соопштението за медиумите од регионалната влада.
Жителите се повикани строго да ги почитуваат безбедносните мерки и воопшто да не го посетуваат полигонот или околните зони во овој период.
Пробниот полигон Кура е еден од клучните објекти под директно управување на Руските воздухопловни сили. Лоциран е на околу 500 километри северно од Петропавловск-Камчатски и со децении служи како примарна локација за тестирање на бојни глави од интерконтинентални балистички ракети.
Овој објект редовно се користи за вежби со гаѓање на ракетни цели и за проверка на нови типови ракетно оружје лансирани од космодромот Плесецк и полигонот Капустин Јар.
Ваквите тестирања на полигонот Кура се одржуваат неколку пати годишно. Тие вклучуваат планирана проверка на нови ракетни системи, но и обука за борбени лансирања кои ги спроведува персоналот на Стратешките ракетни сили на Русија.