Швеѓанецот Олоф Францен се соочува со несекојдневен правен апсурд откако добил сообраќајна казна од 920 евра за прекршок во италијанско крајбрежно одморалиште, земја во која тој и неговиот автомобил никогаш не биле.
Проблемот започнал пред две години кога шведската агенција за наплата на долгови му испратила документација која на прв поглед изгледала сосема автентично. Документите содржеле фотографии од радари за брзина, а регистарската табличка била идентична со неговата. Сепак, на сликите наместо неговиот сив Форд, се наоѓало црвено Сузуки.
„Мислев дека е малку чудно бидејќи никогаш не сум бил во Италија. Многу сум бил во Шпанија, но Италија? Никогаш“, изјавил Олоф Францен за „Хели Готланд“.
Иако првично изгледало дека недоразбирањето е решено, Францен деновиве добил ново барање за истата казна, овојпат од друга агенција за наплата. Швеѓанецот е уверен дека случајот е повторно отворен без никаква основа, со оглед на тоа што тој во меѓувреме не патувал во Италија.
Во најновите писма кои пристигнале на негова адреса повеќе не се наведува точниот износ за плаќање, но притисокот за исплата продолжува. Целата ситуација за Франзен е крајно непријатна, додека тој се обидува да докаже дека неговиот идентитет или таблички се погрешно поврзани со возило во друга држава.