Американскиот претседател Доналд Трамп денеска упати серија жестоки критики и закани кон Иран, порачувајќи дека земјата „нема и никогаш немала никакви шанси“ во конфликтот со Соединетите Американски Држави.
Во изјава која дополнително ги вжештува односите меѓу двете земји, Трамп тврди дека иранското раководство е свесно за својата немоќ, иако во јавноста пласира поинаква слика.
„Тие го знаат тоа. Ми го кажуваат тоа кога разговарам со нив, а потоа излегуваат на телевизија и тврдат колку одлично им оди“, наведе американскиот претседател.
„Уништени воени капацитети“
Трамп ја искористи приликата да го потенцира американскиот воен притисок, повторувајќи дека САД веќе задале сериозни удари врз воената моќ на Техеран. Според неговите зборови, иранските воени капацитети, вклучувајќи ги морнарицата, авијацијата и командната структура, се десеткувани.
Главниот фокус на неговото обраќање остана нуклеарната програма на Иран, за која Трамп употреби особено остар речник:
„Не можеме да дозволиме Иран да поседува нуклеарно оружје… Тоа се болни луѓе и нема да дозволиме лудаци да имаат нуклеарно оружје“, истакна тој.
Економски притисок до точка на кршење
Одговарајќи на новинарско прашање за состојбата на иранската економија, која е под силен удар на Вашингтон, Трамп не ја криеше својата цел – целосен економски колапс на противникот. Тој ги нарече американските санкции „огромни и одлични“, изразувајќи надеж дека иранската економија продолжува да пропаѓа.
Претседателот на САД заклучи дека е подготвен на дополнителни чекори за дестабилизација на иранскиот економски систем, нагласувајќи дека неговата единствена цел во оваа геополитичка битка е – победа.