Под слоганот „За плата се бориме – не се молиме“ денеска во Скопје се одржа протест во организација на Сојузот на синдикатите на Македонија (ССМ), на кој беа побарани повисоки плати и подобри услови за работа.
Протестот започна пред Работничкиот дом, по што маршот продолжи пред Собранието и Стопанската комора, а заврши пред зградата на Владата.
Претседателот на ССМ, Слободан Трендафилов, истакна дека многу работници се плашат да се приклучат на протестите, иако не се задоволни од примањата.
„Денеска за жал 260 илјади работници живеат со плата под 600 евра, а само неколку илјади луѓе излегоа на протест за 1 Мај“, рече Трендафилов.
Тој додаде дека голем број работници гинат на своите работни места и побара поголема заштита, потсетувајќи на историското значење на овој ден.
„Денеска е 1 Мај, денот кога работниците уште во далечната 1886 година излегле на улица и по цена на своите животи, за да ги заштитат своите работнички права, за да го скратат работниот ден од 12 часа на 8 и за да протесираат“, порача Трендафилов.
Свои барања упати и Томислав Гиевски од Независниот синдикат за образование и наука, кој инсистира на почитување на колективните договори и пресметка на платите согласно законските коефициенти.
„Бараме во најбрз можен рок да започне почитување на колективните договори и достоинствено вреднување на трудот на вработените во секторот образование. Бараме достоинствена плата и достоинствено вреднување на трудот за вработените во детска заштита“, изјави Гиевски.
На денешниот протест не учествуваше СОНК, со став дека решенијата треба да се бараат преку дијалог, а не преку протести.