Државата објави оглас за продажба на 71 говедо од случајот во Крива Паланка, стадо кое со години им создаваше проблеми на жителите во овој регион. По низа реакции, апсења на сопствениците и институционални лавиринти, Владата одлучи да ги стави животните на лицитација со почетна цена од над 50.000 евра.
Сепак, бројката на заловени животни е намалена. Агенцијата за храна и ветеринарство (АХВ) потврди дека од ноември досега угинале дури 21 говедо. Како причина за угинувањето, Агенцијата ја наведува агресивноста на животните кои не биле навикнати на затворен простор.
„Агенцијата за храна и ветеринарство (АХВ), од 22.11.2025 година, досега одзема и залови вкупно 92 говеда од различен пол, старост и категорија. Од нив, 57 се идентификувани со ушни маркички, а 35 се без идентификациска ознака. Од вкупниот број одземени и заловени говеда, досега 21 говедо е угинато, од различна етиологија, најголемиот дел поради насилна смрт (самоповредување). Станува збор за животни кои досега не биле шталски чувани, односно живееле и се размножувале слободно, во природа“, велат од АХВ за „Фактор“.
Според надлежните, по заловувањето и сместувањето во штала, животните почнале меѓусебно да се повредуваат, особено возрасните машки единки кон помалите.
На лицитацијата ќе бидат понудени вкупно 48 крави и 23 бикови и волови. Случајот отвора дополнителни прашања во јавноста за условите во кои биле чувани животните по одземањето и зошто за угинувањето на толкав број грла се дознава дури сега.