Двајца мажи се повредени во напад со нож кој се случи сред бел ден во населбата Голдерс Грин во северен Лондон. Британската полиција го квалификуваше настанот како терористички инцидент, а антитерористичката единица веќе води истрага за да утврди дали нападот бил целно насочен кон еврејската заедница.
Инцидентот се случил околу 11:16 часот по локално време. Според снимките од надзорните камери, 45-годишниот напаѓач прво оттурнал еден од мажите во сообраќаен знак и повеќепати го избодел. Втората жртва успеала да се одбрани и да побегне откако почнала да вика кон напаѓачот. Повредените мажи, на возраст од 76 и 34 години, веднаш се пренесени во болница и, според последните информации, се во стабилна здравствена состојба.
Пред пристигнувањето на полицијата, локалната волонтерска група „Шомрим“ успеала да го задржи напаѓачот на местото на настанот. Кога пристигнале полициските службеници, осомничениот се обидел да ги нападне и нив, по што бил совладан со електрошокер и приведен под сомнение за обид за убиство. Лондонската полиција соопшти дека уапсениот има историја на сериозно насилство и проблеми со менталното здравје. Меѓу полициските службеници нема повредени.
Овој крвав напад доаѓа во период на зголемени тензии во Лондон. Во изминатиот месец беа регистрирани повеќе инциденти насочени кон еврејската заедница, вклучувајќи палење возила на еврејска хуманитарна организација и напади врз синагога.
Британскиот премиер Кир Стармер најостро го осуди настанот.
„Ова е целосно ужасен антисемитски чин. Мора да бидеме целосно јасни во нашата решителност да се справиме со ваквите дела, особено имајќи предвид дека во последно време ги има премногу“, изјави Стармер.
Реагираа и израелските власти, кои оценија дека ваквите континуирани напади покажуваат оти ситуацијата излегува од контрола и повикаа на итни и решителни мерки за справување со антисемитизмот.