Претседателот на Социјалдемократскиот сојуз на Македонија (СДСМ), Венко Филипче, денеска упати остри критики кон премиерот Христијан Мицкоски, обвинувајќи го за манипулација со јавноста и за владеење кое наликува на времето на Никола Груевски.
При посетата на кочанското село Грдовци, одговарајќи на новинарски прашања, Филипче демантираше дека опозицијата планира да го напушти Собранието. Тој појасни дека тоа е „спин на премиерот“ за да прикаже дека СДСМ бега од работата во институциите. Според него, доколку власта шверцерски го донесе Законот за влада и ја укине техничката (Пржинска) влада, СДСМ ќе се повлече исклучиво од работната група за Изборниот законик.
„Се работи за закон донесен со консензус, на негово лично барање во 2018 година, кога беше вратена Пржинската влада. Ние ќе излеземе и нема да учествуваме во работата за Изборниот закон, а не во работата на Собранието“, појасни Филипче.
Тој ја елаборираше потребата од задржување на техничката влада поради, како што рече, целосната контрола што власта ја има воспоставено врз државниот апарат. Филипче го спореди Мицкоски со поранешниот премиер Никола Груевски, посочувајќи на контролата врз судството, полицијата и медиумите („орбановите медиуми“ и „судиите од тефтерчето“).
На крајот од изјавата, лидерот на опозицијата даде остра оценка за актуелниот премиер.
„Додека ја води оваа влада, колку и месеци понатаму да ја води, ќе биде запаметен по едно големо ништо. Ќе стои како фуснота во историјата на оваа земја – човек којшто ја водел владата и ништо не направил ниту за државата, ниту за граѓаните. Еве, го гледаме тоа по примерот на земјоделците“, заклучи Филипче.