Портпаролката на СДСМ, Богданка Кузеска, на денешната прес-конференција го одбележа деветгодишниот јубилеј од настаните во Собранието на 27 април 2017 година, кои ги оквалификува како „најцрниот ден во историјата на македонската демократија“. Според Кузеска, тој датум е потсетник за тоа како, како што рече, „криминална и недемократска власт може да ја втурне државата во провалија“.
Во своето обраќање, Кузеска упати низа критики кон актуелната власт предводена од ВМРО-ДПМНЕ. Таа тврди дека девет години подоцна, наместо целосна правда, јавноста е сведок на обиди за, како што ги нарече, „срамна рехабилитација на насилниците“. Според неа, по преземањето на власта, осудените лица за 27 април се пуштаат од затвор, а истите структури повторно се активираат.
„Денеска истата екипа. Истата банда. Истата криминална матрица. Истите луѓе, истите методи, истата агенда“, истакна Кузеска. Таа додаде дека истите личности кои биле инволвирани во тогашните случувања, денес се носители на антиевропската кампања и се дел од медиумски мрежи кои вршат притисок врз опозицијата.
Кузеска во пресот директно го посочи и премиерот Христијан Мицкоски, тврдејќи дека под негово водство Македонија повторно се турка кон концепт на „заробена држава“. Таа посочи на, според неа, „избор на судии и обвинители под негова контрола“, како и „линч и јавни напади врз опозицијата“.
На крајот, портпаролката на СДСМ заклучи дека 27 април не е само историски датум, туку „опомена што се случува кога државата ќе биде заробена“, повикувајќи на внимателност пред, според нејзините зборови, структурите кои сакаат повторно да ја загрозат демократијата.