Силен циклон го зафати европскиот дел од Русија, предизвикувајќи екстремни временски услови, обилни врнежи од дожд, снежни бури и силни ветрови. Вредноста на воздушниот притисок во циклонот е намалена на само 975 милибари, што укажува на многу силен систем кој полека се движи кон исток.
Временските услови драстично се влошија во текот на вчерашниот ден, кога Москва беше погодена од обилни дождови, додека на северозапад од Русија и во Санкт Петербург почна да паѓа снег. Во јужните делови од московската област биле забележани и грмотевици.
Ситуацијата се влоши во текот на ноќта, кога дождот во Москва премина во снег, проследен со силни ветрови кои достигнуваат налети од 70 км/час. Надлежните најавуваат дека снежната бура ќе продолжи и денеска, а се очекува формирање на снежна покривка до 20 сантиметри.
Температурите се далеку под просекот за овој период од годината. Додека просечната максимална температура за крајот на април во Москва изнесува околу 15 степени, моментално тие се движат околу нулата, со најава за задржување во интервалот од 0 до 5 степени во наредните денови.
Циклонот, покрај студот што го носи на запад, во својот преден дел предизвикува силни јужни струи кон Сибир, каде се регистрирани невообичаено високи температури. Очекувањата се дека пролетта постепено ќе се врати почетокот на мај, кога се прогнозира значително затоплување.