Премиерот Христијан Мицкоски во вчерашното интервју за „Тема на денот“ на Сител телевизија најави нови мерки за ублажување на последиците од нафтената криза. Тој истакна дека Владата интензивно работи на подобрување на животниот стандард, притоа справувајќи се со, како што рече, наследениот хаос и долговите од претходната власт.
Споредувајќи ја актуелната состојба со енергетската криза од 2022 година, премиерот посочи дека сегашната инфлација изнесува меѓу 4,5% и 4,9%, што е значително пониско од нивото над 10% забележано пред две години.
„Второ излезе Меѓународниот монетарен фонд јасно кажа дека ние како држава сме трета во Европа според мерките коишто ги применивме визави процент од бруто домашниот производ. Тешко се живее, точно, никој не вели дека се живее лесно, тешко се живее и во Германија, еве сега се враќам од Австрија, тешко се живее и во Австрија, таму пак литар бензин и дизел се над 2 евра, па сега морале да ослободат околу 50 илјади барели од државните резерви да може да амортизираат цена, секаде тешко се живее. И тогаш стандардот во Германија, Франција, Италија, Австрија бил поголем од тој што бил во Македонија, но прашањето е дали таа разлика се намалила, ако ја мерите тогаш и сега, двојно се намалила“, изјави премиерот Мицкоски.
Тој нагласи дека се свесни за критиките од јавноста и најави дека Владата ќе продолжи да интервенира преку нови мерки, и покрај оптоварениот буџет.
„Ќе има дополнителни мерки иако ние досега прилично многу го изложивме буџетот и ќе треба да видиме, бидејќи еве втор месец завршува од кризата која е историски најголема според Светската енергетска агенција, оваа криза е поголема од онаа во 2022 година и двете кризи во седумдесеттите години заедно, а ние сме тамар каде што сме и сега сметајте да имате по 30, 40 или 60% по литно поевтино гориво од соседите. Тоа е успех, дали е доволно, не е доволно, дали тешко се живее, да, но ќе се бориме да биде подобро“, нагласи премиерот Мицкоски.