Почнувајќи од утре, 23 април 2026 година, љубителите на пишаниот збор ќе можат полесно да стигнат до СЦ „Борис Трајковски“, каде се одржува 38-от „Меѓународен саем на книгата“. ЈСП Скопје, со цел да го олесни пристапот до оваа културна манифестација, воведува две специјални автобуски линии.
Во текот на времетраењето на саемот, односно од 23 до 29 април, во сообраќај ќе бидат вклучени линиите „100“ и „200“.
Автобусот со ознака „100“ ќе поаѓа од населбата Ново Лисиче, додека линијата „200“ ќе поаѓа од населбата Дексион. Двете линии ќе сообраќаат директно до СЦ „Борис Трајковски“.
Од ЈСП напоменуваат дека цената на билетите за користење на овие линии е согласно редовниот ценовник за јавен превоз, односно нема дополнителни поскапувања за овие специјални линии. Посетителите можат да ги погледнат возните редови и трасите на движење на официјалните канали на ЈСП Скопје.