Поради обилните врнежи од дожд кои го зафатија дебарскиот регион од вчера попладне, на патните правци во овој дел од државата се евидентирани помали, но чести одрони од земја и камења. Надлежните апелираат до возачите за максимална претпазливост.
Од дебарската секција на Јавното претпријатие за одржување на магистрални и регионални патишта соопштија дека нивните екипи се постојано на терен со цел расчистување на коловозите и овозможување безбеден сообраќај.
„Има помали но чести одрони од камен и земја. Поради тоа, но и влажните коловози се препорачува внимателно возење и строго почитување на патната сигнализација“, порачуваат од секцијата.
Критични точки каде најчесто се појавуваат одрони се:
- На правецот Дебар – Маврово: околу селата Рајчица, Косоврасти и Јанче, месноста Ростушки Мост, близина на Бигорски манастир и „Сенечки ливади“.
- На правецот кон Струга: кај месноста „Три чешми“ (Манастирец).
Екипите ја следат состојбата на сите 110 километри под нивна надлежност, вклучувајќи ги и делниците кон граничниот премин „Блато“, кракот кон Бошков Мост и патот Мелнички Мост – Центар Жупа.