Управата за хидрометеоролошки работи (УХМР) издаде предупредување за промена на временските услови под влијание на циклонска активност. Во текот на денешниот и утрешниот ден се очекуваат пообилни врнежи од дожд, кои на одредени места ќе надминат 30 l/m².
Според прогнозата за утре, времето ќе биде променливо облачно со повремени врнежи од дожд, кои ќе бидат поизразени во западните делови од државата. Ќе дува умерен до засилен ветер од северен правец. Во Скопје се очекува променливо облачно време со дожд и слаб до умерен северен ветер.
Периодот до четврток ќе биде под влијание на влажна и нестабилна воздушна маса, што ќе услови променливо и нестабилно време со повремени врнежи. Денес и утре е можна и појава на грмежи, а процесите наместа ќе бидат поинтензивни во форма на невреме со пороен дожд, грмежи и засилен ветер, особено во западните и јужните делови.
Покрај врнежите, се најавува и значителен пад на дневните температури. Кон крајот на работната недела, поточно во четврток и петок, се очекува утринските температури на некои места да се спуштат и под нулата. Во четврток се очекува засилен, повремено силен северен ветер.