Американскиот претседател Доналд Трамп изрази силен оптимизам во пресрет на дипломатските разговори во Исламабад, каде што американска делегација предводена од потпретседателот Џеј-Ди Венс ќе се обиде да стави крај на конфликтот со Иран. Трамп нагласи дека целта на неговата администрација е постигнување стабилно решение кое ќе донесе мир.
Иако тензиите се високи, претседателот верува дека постои простор за договор кој ќе биде во интерес на националната безбедност на САД, но и на регионалната стабилност.
„Мислам дека ќе направиме многу добар договор со Иран. Ќе видиме што ќе се случи, но имам добар претчувство за ова. Тие сакаат да се направи нешто, а и ние сакаме исто така“, истакна Трамп пред новинарите.
Во преговарачкиот тим, покрај Венс, се наоѓаат и клучни фигури како Џаред Кушнер и Стив Виткоф. Трамп посочи дека овој состав е внимателно избран поради нивното искуство во решавање на комплексни геополитички спорови.
Претседателот уште еднаш ја подвлече својата стратегија на „мир преку сила“, но со отворена врата за дипломатија:
„Ние сме во многу силна позиција. Иранците знаат дека не се шегуваме, но исто така знаат дека сме фер. Ако се разумни, војната ќе заврши многу брзо.“
Преговорите во Пакистан се сметаат за историски момент кој може да ја редефинира американската политика на Блискиот Исток и да го спречи понатамошното ширење на конфликтот.