Иран од сабота, 18 април, почна со постепено отворање на својот воздушен простор, овозможувајќи повторно користење на транзитните летови низ источните коридори од земјата. Оваа одлука, која стапи на сила во 7:00 часот по локално време, доаѓа по детални безбедносни проценки и цивилно-воена координација.
Според податоците од порталот за следење летови Flightradar24, првите меѓународни авиокомпании веќе почнаа да ги користат новоотворените рути, што укажува на почеток на нормализација на сообраќајот над овој стратешки регион.
Сепак, иранските власти задржаа значителни ограничувања. Западниот дел од воздушниот простор, вклучително и клучната област околу Техеран, останува затворен, што значи дека најдиректните рути меѓу Европа и Азија сè уште не се достапни. Поради ова, авиокомпаниите сè уште ги користат алтернативните патеки преку Каспиското Море или Арапскиот Полуостров, кои беа воведени во изминатите два месеци.
Авијациските експерти очекуваат дека во наредните денови обемот на сообраќај ќе покаже дали Иран ќе успее да ја врати својата позиција на клучна транзитна точка за интерконтиненталните летови.