Екипите на „Македонски шуми“ и ТППЕ Куманово се сè уште на терен и вложуваат максимални напори за целосно гаснење на пожарот кој вчера околу пладне избувна во близина на акумулацијата Глажња во општина Липково.
Кире Михаилов, заменик директор на претпријатието, упати сериозни обвинувања дека пожарот е намерно подметнат. Според него, доказите на терен се јасни.
„Пожарот има зафатено две страни од широк прооден пат, што значи дека намерно е подметнат на двете страни, инаку нема никаква можност огнот да биде префрлен од едната на другата страна по природен пат“, изјави Михаилов.
Тој се сомнева дека овој инцидент е директна одмазда поради неодамнешната акција на претпријатието за одземање на нелегално исечени дрва во овој регион. Екипите интензивно работат во текот на денешниот ден за да го стават пожарот под целосна контрола и да спречат негово ширење кон повисоките места, каде што теренот е непристапен.