Пратеникот од редовите на ВМРО-ДПМНЕ, Бране Петрушевски, на денешната прес-конференција упати остри критики кон раководството на СДСМ и неговиот лидер Венко Филипче, обвинувајќи ги за политичка немоќ и очај.
Петрушевски ја обвини опозициската партија дека се обидува да ја прикрие внатрешната криза и распадот на партиските структури со славење на изборните резултати на сестрински партии во странство. Тој потенцираше дека СДСМ јавно го слави резултатот на политичка групација во Унгарија, притоа молчејќи за фактот дека таа партија освоила само 1 отсто од гласовите.
„Во СДС се толку очајни што слават победа на сестринска партија на ВМРО-ДПМНЕ во друга држава, додека нивната се распаѓа на парчиња. СДС и Филипче не кажаа ни збор за нивната сестринска партија од Унгарија која освои 1 отсто од гласовите“, рече Петрушевски.
Пратеникот од ВМРО-ДПМНЕ го повика Филипче да одговори дали на актуелната средба на Партиите на европски социјалисти во Хрватска, тој ги информирал своите колеги за изборните порази и за неговата моментална политичка состојба во Македонија. Петрушевски оцени дека Филипче и СДСМ се соочуваат со екстремно низок рејтинг, што, според него, се должи на недостигот од визија и програма, и прогнозираше слични изборни резултати за СДСМ доколку продолжат со сегашните политики.