Основното јавно обвинителство (ОЈО) Кавадарци отвори истрага и побара притвор за две лица од демиркапиското село Корешница, на возраст од 37 и 30 години, кои се сомничат за тешко кривично дело – грабнување. Инцидентот, кој наликува на филмско сценарио, се случил на 12 април, кога осомничените брутално претепале жител на Неготино со цел да изнудат признание за силување.
Според информациите од Обвинителството, мотивот за грабнувањето бил обидот на 37-годишникот да го присили оштетениот да сними изјава во која признава дека ја силувал неговата сопруга. Грабнувањето започнало во дворот од куќата на жртвата во Неготино. Триесетгодишниот соизвршител употребил пиштол, кој го репетирал и му се заканил на оштетениот, по што насилно го качиле во автомобил.
Насилничкото возење продолжило по стариот пат кон Демир Капија. Осомничените за цело време го удирале оштетениот со боксови, му го фрлиле мобилниот телефон и му ставиле црни ќеси на главата за да ја изгуби ориентацијата. Откако пристигнале во шумски предел, го извадиле од возилото и продолжиле со тортурата. Го удирале со боксови и пластична цевка, нанесувајќи му тешки телесни повреди, а се заканувале и со убиство и силување доколку не признае дека тој е лицето кое се слуша на одредени аудио снимки. Жртвата през целото време ги негирала обвинувањата.
Спасот за грабнатиот дошол благодарение на неговата присебност и на соседите. Пред да му биде одземен и фрлен телефонот, тој успеал да испрати СМС порака за помош до полицијата, а соседите кои го виделе насилното внесување во возилото исто така реагирале. Полицијата брзо ги идентификувала и ги контактирала грабнувачите. Сфаќајќи дека се откриени, тие самите го однеле претепаниот маж во полициската станица во Неготино.
Бидејќи за ова кривично дело е предвидена затворска казна од најмалку четири години, надлежниот јавен обвинител до судијата на претходна постапка достави предлог за одредување мерка притвор, поради опасност од бегство или повторување на делото.