Германскиот авиосообраќај денеска е во тотален прекин откако пилотите на националниот авиопревозник „Луфтханза“ стапија во масовен штрајк. Поради несогласувањата со раководството околу платите и пензиските шеми, само на аеродромот во Франкфурт се откажани повеќе од 1.100 полетувања, додека во Минхен оваа бројка достигна 700 летови.
Штрајкот, организиран од синдикатот ВС, ги опфаќа пилотите на матичната компанија, но и на подружниците „Луфтханза карго“ и „Луфтханза ситилајн“. Главните барања се насочени кон покачување на платите и корекција на надоместоците за пилотите во подружницата „Ситилајн“.
Додека пилотите на „Евровингс“ се очекува денеска да се вратат на работа, ситуацијата дополнително ќе се влоши во наредните денови. За утре и задутре веќе е најавен протест и на кабинскиот персонал, што ќе биде петти ваков штрајк во компанијата од почетокот на годината.