Министерот за животна средина и просторно планирање, Мухамед Хоџа, на денешната собраниска седница наменета за пратенички прашања најави целосна реформа во секторот води. Одговарајќи на прашањето на Димитар Ковачевски, Хоџа истакна дека Програмата за 2026 година предвидува конкретни мерки за подобрување на снабдувањето со питка вода и заштита од поплави.
Според министерот, веќе се подготвени измени на Законот за води со кои ќе се воспостави нов систем на тарифи и поголема транспарентност. Хоџа откри дека со поддршка на Швајцарија се работи на планот за реката Вардар, а преку ИПА фондовите и Европската инвестициска банка се обезбедуваат средства за заштита на речните корита и третман на отпадните води.
„Нашиот пристап не е декларативен, туку системски. На долгорочен план градиме функционален и транспарентен систем за менаџирање со водните извори, усогласен со строгите директиви на ЕУ“, порача Хоџа.