Пратеникот на ВМРО-ДПМНЕ, Бране Петрушевски, на денешната прес-конференција упати серија обвинувања до раководството на СДСМ и поранешниот премиер Зоран Заев, тврдејќи дека молчат за случајот поврзан со Деталниот урбанистички план во Тетово и бизнисменот Миодраг Давидовиќ – Дака.
Според Петрушевски, јавноста сè уште нема одговори за тоа каде завршиле милионските суми споменати во јавно објавените аудио снимки.
„Нема одговори од СДС, Филипче и Заев за тоа каде завршиле 4 милиони евра кои Дака според аудио снимките од неговиот разговор со Кичеец, му ги дал на Заев за градење на 2.000 станбени единици во Тетово“, истакна пратеникот.
Од ВМРО-ДПМНЕ прашуваат дали освен почетната сума, постоел договор и за процент од продажбата на становите, чија вредност се проценувала на околу 200 милиони евра. Петрушевски обвини дека поради лични бизнис интереси била загрозена државната политика и евроинтеграцискиот процес.
„По се изгледа, единствениот одговор се парите. За пари во џеб, СДС, Заев и Филипче се спремни да шират антидржавна политика и да и штетат на Македонија во процесот на евроинтеграциите“, заклучи Петрушевски.