Министерот за надворешни работи и надворешна трговија, Тимчо Муцунски, престојува во работна посета на САД, каде утре ќе ја предводи високата владина делегација на втората сесија од Стратешкиот дијалог меѓу двете земји. Овој состанок се смета за клучна платформа за продлабочување на партнерството со Вашингтон.
Од Министерството за надворешни работи и надворешна трговија (МНРиНТ) појаснуваат дека фокусот на разговорите ќе биде ставен на одбраната, безбедноста, економијата и енергетиката.
„Стратешкиот дијалог е значаен за унапредување на соработката во области како сајбер-безбедноста, технолошката соработка и заедничката борба против транснационалните закани. Со ова се потврдува континуитетот на сојузништвото и посветеноста кон стабилноста на регионот“, стои во официјалното соопштение.
Муцунски претходно истакна дека Македонија е првата земја во Европа која во рамки на оваа американска администрација ќе одржи ваква сесија во Вашингтон, изразувајќи надеж дека дијалогот ќе донесе конкретни економски бенефити за граѓаните.