Јавната установа Национален парк „Пелистер“-Битола викендов постави 40 камери за мониторинг на повеќе стратешки локации, вклучувајќи ги реоните на Нижо Поле, Цапари, Вртушка и Брајчино. Овие активности се дел од современите методи за заштита, следење на природата и научни истражувања во паркот.
Директорот на ЈУНП „Пелистер“, Иванчо Тошевски, појасни дека преку системот на фото-замки ќе се добиваат прецизни информации за движењето и навиките на животните.
„Главната цел на овој систем е да обезбеди прецизни информации за состојбата во природата, преку следење на движењето и навиките на дивите животни, проценка на бројноста на популациите, навремено детектирање на потенцијални закани и поддршка на научни и стручни анализи. Посебен фокус е ставен на мониторинг на клучни видови како кафеавата мечка, дивокозата и карактеристични видови птици и растенија, како и на крупни цицачи волк, рис, дива свиња и срна, кои се индикатори за здравјето на екосистемот“, информира Тошевски.
Покрај дивиот свет, во континуитет се следат и специфичните природни живеалишта како глацијалните езера, моликовите шуми и камените реки. Сите податоци собрани од камерите ќе му бидат достапни и на СВР Битола, со цел да се подигне нивото на безбедност во рамките на паркот.