Вицепремиерот и министер за транспорт, Александар Николоски, уверува дека преговорите за решавање на проблемот на македонските транспортери со новиот Систем за влез/излез на ЕУ (ЕЕС) се одвиваат во позитивна насока. Тој соопшти дека е издејствувано одложување на примената на овој систем за македонските камиони и автобуси до 30 септември, што остава доволно простор да се завршат сите неопходни бирократски процедури.
Одговарајќи на новинарски прашања по увидот во градежните работи на првата делница од „Градскиот воз“, Николоски појасни дека главното решение за транспортерите се долгорочните визи, кои веќе почнуваат да се имплементираат во дел од европските земји.
„Преговорите одат добро. Во делот на камиони и во делот на автобуси системот ќе почне да се применува од 30 септември. Значи веќе добивме одложување. Одиме на долгорочни визи. Швајцарија веќе ги воведе и веќе се издаваат. Во Хрватска законот е во Саборот и очекуваме за неколку седмици да биде усвоен, а во Романија веќе влезе во процедура“, изјави Николоски.
Тој додаде дека и од Унгарија е добиено ветување оти законот ќе влезе во процедура веднаш по завршувањето на изборите и формирањето на новиот Парламент.
За да се покријат сите клучни рути, најавена е и дипломатска офанзива. Николоски откри дека во втората половина на април, владина делегација предводена од премиерот Христијан Мицкоски ќе патува за Австрија, каде токму ова прашање ќе биде високо на агендата. Според министерот, останува да се постигне договор уште со Германија за да бидат целосно обезбедени главните рути на нашите превозници. За Велика Британија, пак, важат посебни правила бидејќи е надвор од ЕУ и Шенген зоната.