Управата на националниот парк „Маврово“ започна со имплементација на систем за видеонадзор со цел повисоко ниво на заштита на природата и зголемена безбедност на дивиот свет и посетителите.
Одделението за заштита и мониторинг на паркот постави камери на 60 локации низ територијата на паркот. Како што соопштија од НП „Маврово“, ова е во согласност со законските надлежности и обврски за заштита, одржливо управување со природните вредности, биолошката разновидност и екосистемите.
-„На ваков начин ќе се следат дивите животни и нивната бројност. Дополнително, ќе се овозможи превенција и рано откривање на незаконски активности како бесправна сеча, лов, загадување и уништување на природните ресурси“, наведуваат од паркот.
Видеонадзорот ќе овозможи и подобро следење на состојбите во природата, движењето на дивите животни и навремена реакција од страна на надлежните служби, со што се унапредува севкупната заштита и управување со паркот.
Од управата апелираат до посетителите да се придржуваат до правилата за движење и престој, да ја почитуваат природата и да постапуваат одговорно во зачувувањето на природното богатство.