Претседателот на Уставниот суд Дарко Костадиновски, заедно со претседателот на Врховниот суд Африм Фидани и членот на Судскиот совет Александар Камбовски, во рамки на заедничката посета на Атина остварија повеќе работни средби со високи претставници на правосудните институции на Република Грција, насочени кон унапредување на владеењето на правото и меѓуинституционалната соработка.
Делегацијата се сретнала со претседателката на Судот за ревизија, Сотириа Тоуни, и заменик-генералниот јавен обвинител Антонис Никитанис, при што биле презентирани улогата и мисијата на оваа институција, основана во 1829 година, со акцент на јавните финансии, превентивната контрола на јавните набавки и советодавната функција во однос на договорите на државните органи.
Се одржа и средба во Министерството за правда со постојаниот секретар Василики Ѓави, потпретседателот на Врховниот суд Панајотис Ливоропулос и заменик-јавниот обвинител Софоклис Логотетис, каде беа разменети мислења за зајакнување на институционалните капацитети, модернизација на судските системи и размена на добри практики, особено во контекст на претстојното грчко претседавање со Европската Унија и можностите за нови иницијативи во областа на дигитализацијата.
Во рамки на посетата, македонската делегација имаше и средба со Михалис Пикраменос, претседател на Државниот совет на Грција, на која беа разменети искуства за уставна контрола и функционирањето на двата системи. Беше истакнато дека довербата во судството е клучен предуслов за стабилноста на демократските процеси.
Претседателот Костадиновски упати покана за возвратна посета на Уставниот суд на Северна Македонија и за учество на Балканскиот форум на уставни судови како платформа за регионална размена на искуства и зајакнување на уставно-судската пракса.