И покрај обидите на германската влада да го ограничи поскапувањето, цената на дизелот во земјата достигна историски рекорд од 2,327 евра за литар. Како што пренесува „Tageschau“, податоците на германскиот автоклуб ADAC потврдуваат дека е надминат претходниот рекорд од март 2022 година за 0,6 центи.
Истовремено, забележан е и сериозен скок кај бензинот, кој достигна цена од 2,129 евра за литар, што претставува највисоко ниво во текот на оваа година. Од ADAC реагираат дека ваквите поскапувања се несоодветни, особено што цената на суровата нафта на светските берзи бележеше пад во периодот меѓу 31 март и 1 април.
Ваквите состојби доаѓаат во време кога германските власти воведоа „кочница за цената на горивото“, мерка која дозволува само едно поскапување во текот на денот. Сепак, анализите покажуваат дека веќе во првиот ден од имплементацијата, цените пораснале во просек за осум центи. Постојат стравувања дека нафтените компании воведуваат дополнителни маржи за да ги компензираат новите ограничувања.