Иранската револуционерна гарда (ИРГЦ) соопшти дека соборила американски борбен авион од типот Ф-35 во централниот дел на земјата. Информацијата беше првично објавена на каналот Телеграм на новинската агенција „Фарс“.
Според официјалното соопштение, леталото е „тотално уништен и урнат“, а поради сериозноста на оштетувањата, засега нема достапни информации за судбината на пилотот. Иранската агенција „Мехр“ дополнително објави дека е малку веројатно пилотот да успеал да се катапултира поради „силната експлозија“ која се случила за време на инцидентот.
Од друга страна, Централната команда на САД (CENTCOM) сè уште не излезе со официјален одговор на овие конкретни наводи. Американските власти претходно веќе ги демантираа сличните тврдења на ИРГЦ за соборени летала.
Додека официјален Техеран тврди дека станува збор за Ф-35, дел од воените аналитичари на социјалните мрежи шпекулираат дека соборениот авион би можел да биде моделот Ф-15е. Ситуацијата на терен останува предмет на натамошни проверки.