На 63 годишна возраст почина Зоран Маневски професор по виолина во Државното музичко училиште во Битола. Многу пати учествуваше на фестивалите во Македонија – „Валандово“, „Цветници“, “Тетовски Филиграни“, „Интерфест Битола“, „Серенада“ и др. Погребот се одржа вчера во 13 часот, во Светонеделските гробишта.
Од него се прости македонскиот пејач Димитар Андоновски чиј професор бил Маневски.
-Денес за последен пат се простуваме со човекот кој е еден од најзаслужните што јас денес сум музичар.
Човекот што прв ме фати за рака кога се запишав во нижото музичко училиште. Ме праша што сакам да свирам, а јас му одговорив – гитара. Ми рече дека нема таков отсек и дека можам да учам виолина. Прифатив. Потоа ме праша кого сакам за наставник, а јас без размислување му одговорив – Вие.
Така започна еден пат што го носам во себе целиот живот.
Професор Зоран Маневски беше човек кој создаде генерации, човек кој живееше за музичкото училиште, за учениците, за знаењето и за иднината на многу млади луѓе. Такви луѓе не се забораваат, затоа што не оставаат трага само во професијата, туку и во душата.
Со голема тага ја примив веста, професоре Зоран… Прерано не напуштивте.
Ви благодарам за се што направивте за мене, за подадената рака на самиот почеток, за вербата, за насоката и за човечноста.
Бог нека ви дарува вечно небесно царство.
Нека ви е светол патот, напиша пејачот.