Министерот за надворешни работи и надворешна трговија, Тимчо Муцунски, денеска оствари значајна средба со британскиот амбасадор Метју Лосон. Главна тема на разговор беше реализацијата на стратешкото партнерство меѓу Македонија и Обединетото Кралство, со фокус на конкретни проекти кои треба да го забрзаат домашниот економски раст.
Муцунски преку својот Фејсбук-профил информираше дека соработката ќе се интензивира во неколку клучни сектори.
„Разговаравме за конкретни чекори за продлабочување на соработката со акцент на области од значење за економскиот развој, како инфраструктурата, образованието и здравството“, истакна министерот Муцунски.
На средбата беше потврдена заедничката подготвеност за натамошно унапредување на билатералните односи, кои во овој период бележат позитивна динамика.