Американската администрација под водство на претседателот Доналд Трамп ги финализира плановите за решавачка воена операција против Иран. Секретарот за одбрана, Пит Хегсет, упати остра порака до властите во Техеран, нагласувајќи дека дипломатијата отстапува пред воената сила со цел трајно неутрализирање на иранската закана.
Операцијата, која се нарекува „Финален удар“, предвидува четири клучни стратешки опции. Првата и најнепосредна е воспоставување целосна контрола врз Ормускиот Теснец преку окупација на стратешките острови Ларак и Абу Муса. Втората опција вклучува заземање на островот Харг, кој е главен центар за извоз на иранска нафта, со што економијата на земјата би била целосно парализирана.
Секретарот за одбрана Пит Хегсет беше дециден во својот настап: „Ние преговараме со бомби. Имате избор, додека нашите сили крстосуваат над Техеран, сами да одлучите за вашата иднина. Нашата мисија е јасна – уништување на офанзивните ракети, капацитетите за нивно производство и клучната безбедносна инфраструктура.“
Најопасните сценарија кои се разгледуваат во Пентагон вклучуваат и копнени упади во внатрешноста на Иран. Целта на овие високоризични мисии би била обезбедување на иранските нуклеарни постројки и залихите на збогатен ураниум, за да се спречи режимот да употреби „валкана бомба“ како последен чин на очај.
Хегсет порача дека САД нема да запрат додека не се исполнат целите: „Иранците никогаш нема да имаат нуклеарно оружје. Оваа администрација нема да дозволи закани кон нашите сојузници и нашиот народ. Силата е единствениот јазик што овој режим го разбира.“
Додека елитната 82-ра воздушно-десантна дивизија е веќе во состојба на целосна подготвеност за распоредување, светот со неизвесност очекува дали ова ќе биде воведот во најголемиот воен судир на Блискиот Исток во овој век.