Министерот за економија, Бесар Дурмиши, денеска во Собранието ги бранеше владините политики за заштита на стандардот на граѓаните, истакнувајќи дека преземените чекори за стабилизирање на цените веќе даваат видливи ефекти. Одговарајќи на прашање на Оливер Спасовски, тој посочи дека државата навреме реагирала со намалување на ДДВ за нафтата од 18 на 10 проценти.
Дурмиши нагласи дека инфлацијата во последните два месеци е во опаѓање и дека Државниот пазарен инспекторат со 30 мобилни тимови врши засилен надзор на терен.
„Не тврдам дека ситуацијата е идеална, но факт е дека во краток период успеавме да создадеме стабилност и предуслови за понатамошен раст. Нема да дозволиме кризата да се злоупотреби на штета на граѓаните“, изјави министерот Дурмиши.
Од друга страна, пратеникот Спасовски упати критика дека одговорите на министерот се само „генерални флоскули“ кои не ја отсликуваат реалноста во маркетите. Тој контрааргументираше со конкретни цени на зејтинот, месото и млекото, тврдејќи дека поскапувањата се евидентни за секој граѓанин.