Секретарот за меѓународна соработка на СДСМ, Андреј Жерновски, на денешната прес-конференција упати остри обвинувања до премиерот Христијан Мицкоски, тврдејќи дека неговите политики водат кон изолација на Македонија и нејзино оддалечување од Европската Унија. Според Жерновски, стратешката позиција на државата е загрозена преку, како што рече, „сомнителни финансиски текови“ и влијанието на унгарскиот премиер Виктор Орбан.
Жерновски се повика на пишувањата на „Вашингтон пост“, нагласувајќи дека поврзаноста меѓу официјално Скопје и Будимпешта има подлабока геополитичка заднина.
„Орбан е пријател на Путин и на Русија, а пријателот на пријателот на Русија, со име Христијан и презиме Мицкоски, е прокси играчот на Русија во овој регион. Ете зошто и на кого мислеше еврокомесарката за проширување кога зборуваше за тројански коњи“, изјави Жерновски.
Тој ја проблематизираше и унгарската кредитна линија од една милијарда евра, посочувајќи дека во исто време Унгарија се задолжила кај Кина за истата сума. Според СДСМ, влијанието на Орбан во земјава се шири и преку телекомуникациите, енергетиката и контролата врз дел од медиумите, додека Владата свесно го одбива патот кон Брисел.