Шеснаесетгодишно момче е уапсено во Сиднеј под обвинение за повеќе кривични дела поврзани со тероризам. Како што соопшти Австралиската федерална полиција (АФП), тинејџерот наводно „изложил планови за насилни дејства“ на интернет.
Акцијата била спроведена во западниот дел на Сиднеј, при што полицијата запленила преклопен нож и „гел-бластер“ пиштол. Покрај тероризмот, момчето се соочува и со обвиненија за поседување неовластен пиштол и забрането оружје, за што е предвидена казна до 14 години затвор.
„Ќе се тврди дека младото лице имало мешана идеологија и изложило планови за насилни дејства“, се наведува во официјалното соопштение на АФП.
На неговите електронски уреди полицијата пронашла „информации поврзани со екстремистичко насилство“. Младиот човек е обвинет за вкупно пет дела поврзани со тероризам, вклучително и собирање и изработка на документи „кои можат да олеснат терористички акт“. За секое од овие дела е предвидена затворска казна до 15 години.