Со цел организирано економско поврзување и заеднички настап на македонската дијаспора, во Торонто се одржа првиот состанок на Основачкиот одбор на Канадско-македонската стопанска комора, иницијатива што има амбиција да стане централна точка на македонскиот бизнис живот во Канада.
Во состав на Основачкиот одбор се Милосов Лукароски, Теа Пешева, Диана Индовски, Иван Лукароски и Кирил Колемишевски, кои со овој чекор отвораат нова фаза на економско организирање на Македонците во Канада.
На состанокот беа поставени темелите на идното дејствување на Комората, со јасен фокус на поддршка на македонските претприемачи, професионалци и компании, како и создавање силна и поврзана бизнис заедница со координиран и стратешки настап.
Комората има намера да ги зајакне деловните односи во рамки на македонската заедница во Канада, но и да отвори простор за трговија, инвестиции и соработка меѓу Канада и Македонија.
Во својата поставеност, таа се позиционира како платформа за поттикнување на претприемништвото, професионалниот развој и градење конкретни мостови меѓу македонските бизниси од двете страни на Атлантикот, со цел создавање стабилна економска мрежа што ќе носи реални резултати.
Основачкиот одбор ја истакна определбата иницијативата да прерасне во силен двигател на економско поврзување, насочен кон долгорочен раст и зајакнување на македонскиот бизнис идентитет во Канада.
Со овој прв состанок, Канадско-македонската стопанска комора го означи почетокот на нова организациска и економска енергија во дијаспората, со потенцијал за видливи и трајни резултати.
Комората е отворена за членство и соработка со сите заинтересирани субјекти од Канада и Македонија, вклучително компании, претприемачи и професионалци кои препознаваат вредност во заедничкиот економски развој.