Царински службеници на Граничниот премин „Блаце“ спречиле обид за криумчарење 120 килограми тутун за наргиле, со вредност од 384 илјади денари, наменет за продажба на македонскиот пазар.
Од Царинската управа информираат дека против сторителот е поднесена кривична пријава за кривично дело „криумчарење“, казниво согласно Кривичниот законик. Со ова е спречена нелегална трговија со акцизна стока, при што избегнатите давачки изнесуваат 744 илјади денари, од кои 342 илјади се акциза.
Како што наведуваат од Царината, сторителот Ф.Б., државјанин на Македонија, набавил 480 пакувања тутун за наргиле од по 250 грама од лице од Приштина. Делот од тутунот го сокрил во багажникот, во просторот наменет за резервна гума, а останатите пакувања ги покрил со прекривка. При влез во државата, на прашањето дали има нешто за пријавување, лицето одговорило дека нема ништо. Поради сомневање во дадената изјава, царинските службеници извршиле детална контрола и пронашле непријавените тутунски производи.
Од почетокот на годината, Царинската управа потсетува дека се откриени четири слични случаи на криумчарење и нелегална трговија со тутунски производи, за кои се поднесени кривични пријави до надлежното обвинителство.