Министерот за одбрана на САД, Пит Хегсет, денес одржа прес-конференција за американско-израелскиот напад врз Иран, со пораката дека „Америка победува“.
„Само четири дена сме во ова, индикаторите се менуваат, прашината слегнува и пристигнуваат дополнителни сили“, рече Хегсет. „Сè уште е рано и, како што рече претседателот Трамп, ќе одвоиме сето време што ни е потребно за да се осигураме дека ќе успееме“. Тој додаде: „Со нив е завршено и го знаат тоа – или ќе го дознаат многу наскоро“.
„Само што почнавме да ги ловиме, разградуваме, деморализираме, уништуваме и победуваме нивните способности“, рече тој. „Почнувајќи од синоќа, а ќе биде завршено за неколку дена – за помалку од една недела – двете најмоќни воздухопловни сили во светот ќе имаат целосна контрола врз небото на Иран. САД и Израел, рече тој, ќе летаат дење и ноќе, барајќи и уништувајќи ракети и одбранбено-индустриската база на иранската армија, како и нивните воени и политички лидери, пишува Sky News.
Хегсет потврди дека американска подморница потопи ирански воен брод кој, како што изјави, „мислеше дека е безбеден во меѓународни води“. Претходно пишувавме за наводите дека американската војска извршила напад со кој потонал ирански воен брод кај Шри Ланка. Хегсет рече дека бродот бил потонат од торпедо.
„Ова е прво потонување на непријателски брод од торпедо по Втората светска војна“, додаде тој. „Исто како и во таа војна… се бориме за победа“.
„Водачот на единицата што се обиде да го убие Трамп е убиен“
Хегсет исто така рече дека американските сили „го лоцирале и убиле водачот на единицата што се обидела да го убие Доналд Трамп.“ „Исто така, вчера, водачот на единицата што се обиде да го убие претседателот Трамп беше пронајден и убиен“, рече тој. „Иран се обиде да го убие претседателот Трамп. И претседателот Трамп на крајот излезе како победник“, додаде тој.
На прашањето за повеќе детали за лицата во Иран за кои тврдеше дека се обидуваат да го убијат Доналд Трамп, Хегсет одговори: „Долго време знаеме дека Иран имал намера да го убие претседателот Трамп и/или други американски функционери“, рече тој.
„И иако тоа никогаш не било фокус на операцијата во ниту еден момент – всушност, никогаш не било споменато од претседателот или од некој друг – јас и другите се погриживме оние што се одговорни за тоа на крајот да бидат вклучени на списокот на цели.“
Заедничката американско-израелска воена акција против Иран „никогаш не требаше да биде фер борба“, продолжи Хегсет.
Тој додаде дека воздухопловните сили постојано ќе избираат цели и ќе нанесуваат „смрт и уништување од небото цел ден“. Секретарот за одбрана рече дека САД „играат игра на сè или ништо“: „Тоа не е фер борба. Ги удираме на колена – и така треба да биде“, рече тој.