Градоначалникот на Град Скопје, Орце Ѓорѓиевски одаде почит на починатиот македонски претседател Борис Трајковски.
Градоначалникот на својот фејсбук профил се обрати со емотивна порака по повод 22-годишнината од трагичната смрт на македонскиот претседател Борис Трајковски.
Ѓорѓиевски истакна дека пред две децении Македонија ја почувствува една од најтешките загуби во својата понова историја.
„Борис Трајковски беше повеќе од државник. Тој беше симбол на смиреност во тешки времиња, глас на разумот и човек што искрено веруваше во силата на единството“, напиша Ѓорѓиевски. Тој додаде дека Трајковски со достоинство ја носеше функцијата, но уште поголемо достоинство покажа преку својата човечност.
Според Ѓорѓиевски, визијата на Трајковски за стабилна, демократска и европска држава останува патоказ и денес. „Веруваше во Македонија. Во нејзината иднина, во нејзините луѓе, во можноста да бидеме подобри и посилни заедно“, се вели во неговата објава.
Покрај претседателот Трајковски, во авионската несреќа кај Мостар животот го загубија и осуммина членови на неговата делегација, за кои Ѓорѓиевски истакна дека биле луѓе целосно посветени на службата кон татковината.