Анализата на медиумската мрежа Си-Ен-Ен открива дека повеќе од една четвртина од транскриптите на ФБИ поврзани со случајот на Џефри Епштајн недостасуваат во огромната архива неодамна објавена од Министерството за правда на САД. Меѓу „исчезнатите“ записи се и три интервјуа со жена која тврди дека била сексуално нападната од актуелниот претседател Доналд Трамп пред неколку децении.
Според прегледот на документацијата, од вкупно 325 сериски броеви на интервјуа со сведоци, дури 90 не се јавно достапни. Ова предизвика бурна реакција кај демократите во Конгресот, кои се сомневаат дека администрацијата свесно прикрива материјали.
„Имаме жртва која изнесе сериозни обвинувања против претседателот. Но, се чини дека постојат голем број документи, веројатно записи од испрашувањето на ФБИ за оваа жртва, кои недостасуваат и до кои ние немаме пристап“, изјави конгресменот Роберт Гарсија.
Од друга страна, Белата куќа и Министерството за правда ги отфрлаат ваквите тврдења како сензационалистички. Портпаролот на министерството нагласи дека ништо не е избришано, туку одредени досиеја се класифицирани или се дел од тековни истраги. Трамп во неколку наврати досега ги негираше сите обвинувања за поврзаност со Епштајн.
Истрагата на ФБИ за конкретната жртва, позната како „Џејн Доу 4“, започнала во 2019 година. Таа тврдела дека Епштајн ја злоставувал од нејзината 13-годишна возраст, а подоцна била жртва на напад од страна на Трамп во период помеѓу 1983 и 1985 година.