Пратеничката група на ВМРО-ДПМНЕ и Коалицијата поднесе предлог-закон по скратена постапка со кој се бара продолжување на важноста на Законот за постапување со бесправно изградените објекти за дополнителни пет години.
Според актуелното законско решение, рокот истекува на 3 март 2026 година (за помалку од еден месец), што би значело прекин на сите тековни постапки. Пратеникот Бојан Стојановски на денешната прес-конференција предупреди дека без оваа измена, илјадници граѓани кои се заглавени во административни лавиринти или судски спорови би останале без можност да ги легализираат своите домови.
„Со овој предлог се продолжува рокот до 3 март 2031 година. Се овозможува правна сигурност за општините да можат легално да ги завршат сите веќе почнати постапки“, изјави Стојановски.
Тој потенцираше дека измената не предвидува поднесување на нови барања, туку се однесува исклучиво на старите предмети кои се веќе во процедура. Иницијативата доаѓа како одговор на барањето на ЗЕЛС, а законот нема да предизвика финансиски импликации врз буџетот.