Македонските возачи кои патуваат во Австрија зимава треба да бидат исклучително внимателни со чистотата на своите возила. Австрискиот автомобилски клуб (ÖAMTC) предупредува на строги контроли и драконски казни кои започнуваат од 20 евра, но во одредени случаи можат да се искачат до неверојатни 10.000 евра.
Законот за моторни возила во Австрија не прави разлика меѓу прекршоците, па нечитливата табличка или снег на покривот може скапо да ве чинат. Иако максималната казна се изрекува за кумулативни прекршоци, полицијата е ригорозна кога станува збор за видливоста.
Експертите од ÖAMTC појаснуваат:
„Ако ве запрат и не сте го исчистиле мразот од прозорците, светлата се оштетени и имате многу снег на покривот, тоа лесно може да ве чини 1.500 евра. На властите е да утврдат која казна е соодветна во рамките на законскиот максимум.“
Посебно внимание треба да се обрне на регистарските таблички, кои мора да бидат јасно видливи за полицијата и камерите. Валтер Фајхтнер од државниот оддел за транспорт препорачува возачите да ги бришат табличките и светлата при секоја пауза на патот.