Премиерот Христијан Мицкоски денеска изврши увид во градежните активности за доградба на основното училиште „Невена Георгиева – Дуња“ во Општина Кисела Вода. Проектот опфаќа нови 560 метри квадратни, кои според најавите, треба да бидат ставени во функција со почетокот на новата учебна година.
Мицкоски истакна дека изградбата и реконструкцијата на образовните објекти се во центарот на политиките на оваа Влада.
„Задоволство е секогаш кога правиме увид на ваков тип на проекти. Тоа е дел од суштината на политиките кои ги води оваа Влада и добро е што десетици вакви објекти, заедно со градинките, се градат низ цела држава“, изјави премиерот.
Тој потенцираше дека со овие капитални инвестиции практично се решава акутниот проблем со недостиг на простор во одредени средини. Мицкоски упати честитки до општинската администрација и градоначалничката, нагласувајќи дека суштината на нивната работа е да ги испорачуваат ветувањата дадени пред граѓаните.