Министерот за надворешни работи и надворешна трговија, Тимчо Муцунски, заедно со претседателката Гордана Силјановска-Давкова, во рамки на престојот во Обединетите Арапски Емирати, остварија средба со претставници на македонската дијаспора во Дубаи. На средбата се разговараше за огромниот потенцијал на нашите професионалци кои работат во овој економски центар на светот.
„Македонците во ОАЕ се успешни професионалци кои со своето знаење даваат придонес за локалната економија, но тие се и наш важен мост за продлабочување на трговската соработка меѓу двете држави“, истакна Муцунски.
Главна тема на разговорот беа економските иницијативи и Стратегијата за соработка со дијаспората, која е во завршна фаза. Владата планира поактивно да ги вклучи овие кадри во развојните проекти во Македонија, користејќи го нивното меѓународно искуство и контакти за привлекување нови инвестиции.