Пратеникот на СДСМ, Оливер Спасовски, изрази целосна поддршка за протестот на работниците и за активностите на Сојузот на синдикатите на Македонија, оценувајќи дека борбата за достоинствени плати е легитимна и неопходна во услови на зголемена инфлација и континуирани поскапувања.
Според Спасовски, граѓаните живеат сѐ потешко, бидејќи растот на цените директно го намалува животниот стандард, додека платите не го следат зголемувањето на трошоците за живот. Во тој контекст, тој оцени дека барањето за зголемување на минималната плата на 600 евра е оправдано и реално.
„Инфлацијата и поскапувањата го јадат стандардот на граѓаните. Затоа барањата на работниците се сосема оправдани и неопходни“, изјави Спасовски во Претрес.
Тој нагласи дека СДСМ, и од опозициска позиција, стои зад работниците и синдикатите, потсетувајќи дека партијата поднела предлог-закон за зголемување на минималната плата, како и законски решенија и амандмани за покачување на платите во повеќе сектори, кои, според него, биле одбиени од актуелната власт.
Спасовски потсети и на периодот кога СДСМ беше на власт, посочувајќи дека тогаш било покажано дека е можен поинаков пристап кон работничките права и платите.
„Минималната плата ја зголемивме од 8.000 на над 20.000 денари, а просечната плата од 22.000 на над 42.000 денари. Тоа се факти што покажуваат дека со соодветни политики може да се подобри животниот стандард“, рече тој.
На крајот, Спасовски порача дека обврска на секоја влада е да обезбеди достоинствени плати и сигурна иднина за работниците, нагласувајќи дека без задоволни работници нема стабилна економија ниту одржлив развој.