Силната снежна бура што ги зафати Соединетите Американски Држави во текот на викендот веќе одзеде најмалку десет животи, предизвика енергетски колапс за милиони граѓани и доведе до приземјување на илјадници летови. Националната метеоролошка служба предупредува дека снежните врнежи ќе продолжат и денеска, а околу дваесет сојузни држави, заедно со главниот град Вашингтон, веќе прогласија вонредна состојба.
Метеоролозите го карактеризираат ова невреме како едно од најсилните во последните неколку децении. Екстремно ниските температури и замрзнувањето на клучната инфраструктура создаваат услови кои националната агенција ги опишува како потенцијално катастрофални.
Најкритична е состојбата во големите градови. Градоначалникот на Њујорк, Зохран Мамдани, соопшти дека за време на викендот биле пронајдени пет починати лица на отворено. Иако сè уште не ги знаеме точните причини за нивната смрт, ништо не ни ја покажува појасно опасноста од екстремниот студ и ранливоста на нашите сограѓани, особено оние без дом, истакна Мамдани.
Трагични извештаи пристигнуваат и од јужните делови на земјата. Во Тексас три лица починаа од студ, меѓу кои и тинејџерка која настрадала додека се санкала, додека во Луизијана здравствените власти потврдија два смртни случаи поради замрзнување.
Електричната мрежа е под огромен притисок, па според податоците на специјализираните портали, над 840.000 корисници сè уште се без струја. Најтешко се погодени Тенеси, Луизијана, Мисисипи и Џорџија. Властите во Тексас и Северна Каролина упатија апел до граѓаните да останат во своите домови и да избегнуваат возење, освен во случаи на апсолутна итност.
Невремето сега се движи кон североисточниот дел на земјата, каде што Филаделфија, Њујорк и Бостон се подготвуваат за најсилниот бран на врнежи. Досега низ целата држава се откажани околу 19 илјади авионски летови.
Американскиот претседател Доналд Трамп преку својата платформа Трут Сошал порача дека федералните служби се во постојан контакт со погодените држави и ги повика граѓаните да останат на безбедно и на топло. Тој истовремено ја искористи ситуацијата за да го изрази својот добро познат скептицизам кон климатските промени. Можат ли еколошките бунтовници да ми објаснат: Што се случи со глобалното затоплување?, напиша Трамп.Снежна бура ги парализира Америка: Прогласена вонредна состојба во 20 сојузни држави